விஸ்வரூபம் – 2 படம் எப்போ ரிலீஸ் தெரியுமா? உற்சாகத்தில் கமலியன்ஸ்

உலக நாயகன் கமல் நடித்து, தயாரித்திருந்த விஸ்வரூபம் படம் கடந்த 2013ம் ஆண்டில் வெளியானது. தீவிரவாதத்தை மையப்படுத்தி எடுக்கப்பட்ட அந்த படம் மிகப்பெரிய வெற்றி பெற்றது. இந்த படத்தின் மூலம் பூஜா குமார் ரீ-எண்ட்ரி கொடுத்தார்.

ஹாலிவுட் படத்துக்குச் சவால் விடும் தொழில்நுட்ப நேர்த்தியுடன் உருவாக்கப்பட்டிருந்த அந்த படம் வெளியீட்டின்போது சில சிக்கல்களைச் சந்தித்தாலும், ரசிகர்களின் பெருவாரியான ஆதரவுடன் சூப்பர்ஹிட் ஆனது. ஆப்கானிஸ்தான், அமெரிக்கா என பல்வேறு இடங்கள் தமிழ் சினிமாவில் காட்டப்படாத புதிய இடங்களில் ஷூட் செய்யப்பட்டது. நடனக் கலைஞர், உளவுத் துறை அதிகாரி என பல பரிணாமங்களில் கமல் மிரட்டியிருப்பார்.

முதல் பாகத்தின் வெற்றியைத் தொடர்ந்து விஸ்வரூபம் படத்தின் இரண்டாம் பாகம் உருவாக்கப்படும் என கமல்அறிவித்தார். இதையடுத்து படப்பிடிப்பைத் தொடங்கிய கமல், சில காரணங்களால் படப்பிடிப்பு முடிவது தாமதமானது. இந்தநிலையில், சமீபத்தில் படப்பிடிப்பைத் தொடங்கிய கமல், சென்னை ராணுவ அதிகாரிகள் பயிற்சி மையத்தில் ஷூட்டிங்கை நடத்தி முடித்தார். படப்பிடிப்பின் ஊடே கமல், ஆண்ட்ரியா ஆகியோர் இடம்பெற்ற புகைப்படங்கள் சமூக வலைதளங்களில் வெளியாகி வைரல் ஹிட்டடித்தன.

மேலும், தேசியக் கொடியை தழுவியவாறே கமல் இருப்பது போன்ற படத்தின் பர்ஸ்ட் லுக் போஸ்டர்களையும் படக்குழுவினர் வெளியிட்டனர். இதன்மூலம் ஷூட்டிங் முழுமையாக நிறைவடைந்த நிலையில், போஸ்ட் புரடக்‌ஷன் வேலைகளுக்காக அவர் அமெரிக்காவும் சென்று திரும்பினார். படப்பிடிப்பு வேலைகள் சுறுசுறுப்படைந்ததால், படம் விரைவில் வெளியாகும் என எதிர்பார்க்கப்பட்ட நிலையில் மீண்டும் சில காரணங்களால் படத்தின் ரிலீஸ் தேதி அறிவிப்பு தள்ளிபோனது.

தமிழ் திரையுலகினர் ஸ்டிரைக், அரசியல் கட்சி தொடக்கம், பொருளாதார பிரச்னை என பல்வேறு பிரச்னைகள் இருந்த சூழலில் விஸ்வரூபம் 2 குறித்த எந்த அப்டேட்டும் இல்லாமல் இருந்தது. இந்தநிலையில், விஸ்வரூபம் – 2 படத்தை வரும் ஆகஸ்ட் 15 சுதந்திர தினத்தன்று வெளியிட கமல் திட்டமிட்டிருப்பதாகத் தகவல் வெளியாகியுள்ளது. இதனால், கமல் ரசிகர்கள் உற்சாகமடைந்திருக்கிறார்கள்.