தனுஷ், துரை செந்தில்குமார் கூட்டணியில் ‘கொடி’ படத்தின் இரண்டாம் பாகம் உருவாகிறது.

ஒரு படத்தின் முதல் பாகம் வெற்றியடைந்தால் அந்தப் படத்தின் இரண்டாம் பாகத்தை எடுத்து வெளியிடுகின்றனர். அதுவும் வெற்றியடைந்தால், மூன்று, நான்கு என போய் கொண்டே இருக்கிறது. அதுபோல்தான் தனுஷ் நடித்த ‘விஐபி’ படமும் வெற்றி பெற்று, அதன் இரண்டாம் பாகம் பணி நடைபெற்று வருகிறது. அடுத்ததாக தனுஷ் நடிப்பில் உருவான ‘கொடி’ படமும் வெற்றி பெற்றதால் அந்தப் படத்தின் இரண்டாம் பாகத்தை எடுக்க தயாராகி வருகிறார் இயக்குனர் துரை செந்தில்குமார்.

இயக்குனர் துரை செந்தில்குமார் தனுஷை வைத்து ‘கொடி’ படத்தை இயக்கினார். வெற்றிமாறனின் ‘கிராஸ் ரூட் ஃபிலிம் கம்பெனி’ தயாரிக்க, மதனின் ‘எஸ்கேப் ஆர்டிஸ்ட் மோஷன் பிக்சர்ஸ்’ நிறுவனம் ‘கொடி’ படத்தை வெளியிட்டது. இந்த படத்தில் தனுஷ் இரண்டு மாறுபட்ட வேடங்களில் நடித்திருந்தார்.

‘கொடி’ படத்தின் வெற்றியைத் தொடர்ந்து துரை செந்தில்குமார் இயக்கும் அடுத்த படத்திலும் தனுஷ் நடிக்கவிருக்கிறார். தற்போது இந்த படத்திற்கான ஸ்கிரிப்ட் வேலைகளில் ஆர்.எஸ். துரை செந்தில்குமார் ஈடுபட்டுள்ளார். தனுஷும், துரை செந்தில்குமாரும் இணைந்து பணியாற்றும் நான்காவது படமான இந்த படம் ‘கொடி’ படத்தின் இரண்டாம் பாகமாக உருவாக இருக்கிறது.