பெரும்பாலும் சன் பிக்சர்ஸ் தயாரிக்கும் படங்கள் சோலோவாக ரிலீஸ் ஆகி மிகப்பெரிய வசூலை வாரிக் குவிக்கும். அதுமட்டுமல்லாமல் தான் தயாரிக்கும் படங்களுக்கான விளம்பரங்களை அதிகப்படுத்தி அதே தேதியில் வெளியாக இருக்கும் மற்ற நடிகர்களின் படங்களை பயமுறுத்தி ஒதுங்க வைத்துவிடுவார்கள்.
ஆனால் இந்த வருடம் சன் பிக்சர்ஸுக்கு அந்த அளவுக்கு பெரிய அளவு போட்டி இல்லை. அதற்கு காரணம் தமிழ் சினிமாவில் உள்ள முக்கிய நடிகர்கள் பலரின் திரைப்படத்தையும் ஒரே நேரத்தில் தயாரித்து வருகிறது சன் பிக்சர்ஸ்.
அதில் எதிர்பார்ப்பில் இருக்கும் முதல் திரைப்படம் என்றால் தளபதி 65 தான். ஜார்ஜியாவில் முதற்கட்ட படப்பிடிப்பை தொடங்கியுள்ள தளபதி 65 படத்தின் மொத்த படப்பிடிப்பும் ஆகஸ்ட் மாதத்திற்குள் முடிந்துவிடும் என தெரிகிறது.
அதனைத் தொடர்ந்து ஜனவரி 2022 பொங்கலை குறி வைத்து தளபதி 65 படத்தை வெளியிட சன் பிக்சர்ஸ் நிறுவனம் முடிவு எடுத்துள்ளது. அதற்கு முன்னதாக தீபாவளிக்கு சூப்பர் ஸ்டாரின் அண்ணாத்த படம் வெளியாக உள்ளது.
சோலோ ரிலீஸ் செய்து மிகப்பெரிய வசூலை வாரி குவித்து விடலாம் என சன் பிக்சர்ஸ் கண்ட கனவில் ஒரு லாரி மண்ணை அள்ளிக் கொட்டியுள்ளது மணிரத்னம் இயக்கிவரும் பொன்னியின் செல்வன் திரைப்படம். 100 கோடி பட்ஜெட்டில் மிகப் பிரம்மாண்டமாக உருவாகி வருகிறது.
இரண்டு பாகமாக உருவாகும் பொன்னியின் செல்வன் படத்தின் முதல் பாகம் கிட்டத்தட்ட 70 சதவீத படப்பிடிப்புகள் முடிவடைந்த நிலையில் விரைவில் மொத்த படப்பிடிப்பையும் முடிக்க உள்ளதாம் படக்குழு. இதனால் 2022ஆம் ஆண்டு பொங்கல் விடுமுறையில் படத்தை வெளியிட தயாராக உள்ளாராம் மணிரத்னம்.
