BS3_cinemapettai

சென்னை: பிஎஸ்3 வாகனங்களை பதிவு செய்ய முடியாமல் இருக்கும் விவகாரம் தொடர்பாக சென்னை உயர் நீதிமன்றத்தில் மனு ஒன்று தாக்கல் செய்யப்பட்டுள்ளது.

இந்தியாவில் மோட்டார் வாகனங்கள் வெளியிடும் புகையை கட்டுப்படுத்த பாரத் ஸ்டேஜ் எமிசன் ஸ்டாண்டர்டு எனும் பிஎஸ் தொழில்நுட்பத்தை மாசு கட்டுப்பாடு வாரியம் செயல்படுத்தி வருகிறது. இந்நிலையில், இந்தியாவில் வாகன புகையால் ஏற்படும் சுற்றுச்சூழல் மாசுவை கட்டுப்படுத்தும் நோக்கில் பிஎஸ் 3 வாகனங்களுக்கு தடை விதிக்கக் கோரி, உச்ச நீதிமன்றத்தில் மாசு கட்டுப்பாட்டு வாரியம் சார்பில் வழக்கு தொடரப்பட்டது.
இந்த வழக்கை விசாரித்த உச்ச நீதிமன்றம், 2017, மார்ச் 31-ம் தேதிக்கு பின்னர், பிஎஸ் 3 வாகனங்களை விற்கவோ, தயாரிக்கவோ, பதிவு செய்யவோ கூடாது என உத்தரவிட்டது. தொடர்ந்து, 2017, ஏப்ரல் மாதம் 1-ம் தேதி முதல் பிஎஸ் 3 வாகனங்களை பதிவு செய்யக்கூடாது என அனைத்து வட்டார போக்குவரத்து அலுவலர்களுக்கும் உத்தரவிடப்பட்டது.

இதையடுத்து, வாகன விற்பனையாளர்கள் தங்களிடம் இருந்த பிஎஸ்3 வாகனங்களை சலுகை விலையில் கடந்த மார்ச் 31-ம் தேதிக்கு முன்னரே விற்று தீர்த்தனர். விற்பனை செய்த வாகனங்களுக்கு காப்பீடு போடப்பட்டு, அன்றைய தினமே ஆன்லைன் மூலம் ஆர்டிஒ-விற்கு பதிவு செய்ய விண்ணக்கவும் செய்தனர். ஆனால், இந்த வாகனங்களை பதிவு செய்ய முடியாமல் பொதுமக்கள் தற்போது தவித்து வருகின்றனர். பதிவு செய்யப்படாததற்கு, வட்டார போக்குவரத்து அலுவலகங்களில் சரியான காரணங்களும் கூறப்படுவதில்லை.

இந்நிலையில், வேலூர் மாவட்டம் கட்பாடியை சேர்ந்த சாந்தி என்பவர் சென்னை உயர் நீதிமன்றத்தில் இது தொடர்பாக மனு அளித்துள்ளார். அதில், 2017, மார்ச் 31-ம் தேதிக்கு முன்னரே, பிஎஸ் 3 வாகனத்தை வாங்கி, காப்பீடு பதிவு செய்துள்ளோம். ஆனால், இந்த வாகனத்தை வட்டார போக்குவரத்து அலுவலகத்தில் பதிவு செய்ய முடியவில்லை என கூறப்பட்டுள்ளது. தன்னை போலவே பலரும் இதே பிரச்னையால் அவதிப்படுவதாகவும், சாந்தி தனது மனுவில் கூறியுள்ளார்.

இந்த மனு மீதான விசாரணை சென்னை உயர் நீதிமன்ற நீதிபதி ரவுச்சந்திர பாபு முன்னிலையில் விசாரணைக்கு வந்தது. மனுவை விசாரித்த நீதிபதி, மனு குறித்து விளக்கம் கேட்டு வட்டார போக்குவரத்து அலுவலர்களுக்கு சம்மன் அனுப்பியுள்ளார்.