கமலுடன் விக்ரம் இணையும் படத்தின் முக்கிய அப்டேட்

கமலின் தயாரிப்பில் சியான் விக்ரம் நடிக்க இருக்கும் படத்தின் இசையமைப்பாளராக ஜிப்ரான் ஒப்பந்தம் செய்யப்பட்டு இருக்கிறார்.

சியான் விக்ரம் எப்போதுமே எளிதாக நடித்து வெற்றி பெற வேண்டும் என நினைக்க மாட்டார். அவரின் ஒவ்வொரு படத்திலும் அபரிமிதமான உழைப்பு ஒளிந்து இருக்கும். 50 வயதை கடந்தும் இந்த யுத்தியை இன்றும் கையாண்டு வருகிறார். கோலிவுட்டில் பிஸியாக இருக்கும் விக்ரம் தற்போது கெளதம் மேனனின் கனவுப்படமான ‘துருவ நட்சத்திரம்’, ஹரியின் இயக்கத்தில் ‘சாமி ஸ்கொயர்’, ஆர்.எஸ்.விமல் இயக்கும் பிரம்மாண்ட படைப்பான ‘மஹாவீர் கர்ணா’, ராஜேஷ்.எம்.செல்வா படம் என கைவசம் ஏகப்பட்ட படங்களை வைத்து இருக்கிறார்.

தற்போது, விக்ரம் நடித்து வரும் சாமி ஸ்கொயர் படத்தின் படப்பிடிப்புகள் விரைவில் இறுதிக்கட்டத்தை நெருங்க இருக்கிறது. அதை தொடர்ந்து, செல்வா இயக்கத்தில் உருவாகும் பெயரிடப்படாத படத்தில் நடிக்க இருக்கிறார். கமலிடம் 17 வருடமாக உதவி இயக்குனராக இருந்த ராஜேஷ் எம்.செல்வா கமலின் தூங்காவனம் படம் மூலம் இயக்குனராக அறிமுகமானார். தொடர்ந்து, அவரின் இரண்டாவது படத்தையும் கமல் தனது சொந்த நிறுவனமான ராஜ் கமல் இண்டர்நேஷனல் பிலிம்ஸ் மூலம் தயாரிக்கிறார். இப்படத்தில் விக்ரமுடன் கமலின் இரண்டாவது மகள் அக்‌ஷரா ஹாசன் நடிக்க இருப்பதாக அறிவிக்கப்பட்டுள்ளது. சமீபத்தில் விவேகம் படத்தில் மிரட்டலான நடிப்பை வெளிப்படுத்தியதால், இப்படத்திலும் அக்‌ஷராவிற்கு வலுவான கதாபாத்திரம் கொடுக்கப்பட்டு இருக்கும் என எதிர்பார்க்கப்படுகிறது.

இந்நிலையில், இப்படத்தின் இசையமைப்பாளராக ஜிப்ரான் அறிவிக்கப்பட்டு இருக்கிறார். இதுகுறித்து, தனது மகிழ்ச்சியை பதிவு செய்து இருக்கும் ஜிப்ரான். தனது பதிவில், ராஜ்கமல் இண்டர்நேஷனல் மற்றும் கமல் சாருக்கு இசையமைக்கும் பணியை தொடங்கி விட்டேன். செல்வாவை போன்ற திறமையான இயக்குனர் மற்றும் இசை திறன் கொண்டவருடன் பணியாற்றுகிறேன். என்னுடைய பேவரிட் குழுவுடன் மீண்டும் இயங்க போகிறேன் என தெரிவித்து இருக்கிறார். விரைவில் இப்படத்தின் படப்பிடிப்புகள் தொடங்கும் என தகவல்கள் தெரிவிக்கிறது.