fbpx
Connect with us

Cinemapettai

சசிகலா மனு மீது இன்று விசாரணை

Sasikala

சசிகலா மனு மீது இன்று விசாரணை

புதுதில்லி: அதிமுக பொதுச் செயலாளர் விவகாரம் தொடர்பாக கூடுதல் ஆவணங்களை தாக்கல் செய்ய கூடுதல் அவகாசம் கோரியுள்ள சசிகலா மனு மீதான விசாரணையை தேர்தல் ஆணையம் இன்று நடத்துகிறது.

தமிழக முதல்வராக இருந்த ஜெயலலிதா கடந்த ஆண்டு டிசம்பர் மாதம் காலமானார். அவரது மறைவுக்கு பின்னர், தமிழக முதல்வராக பன்னீர்செல்வமும், அதிமுக-வின் பொதுச் செயலாளராக சசிகலாவும் பதவியேற்றனர். சென்னையில் நடைபெற்ற அதிமுக-வின் பொதுக் குழுக் கூட்டத்தில், அதிமுக பொதுச்செயலாளர் தேர்வு செய்யப்படும் வரை அக்கட்சியின் பொதுச் செயலாளராக சசிகலாவை நியமிப்பது என ஒருமனதாக தீர்மானம் நிறைவேற்றப்பட்டது. அதனடிப்படையில், சசிகலா, அதிமுக பொதுச் செயலாளரானார்.

இதனிடையே, தமிழக முதல்வர் பதவியில் இருந்து ராஜினாமா செய்த பன்னீர்செல்வம், அதிமுக தலைமைக்கு எதிராக போர்க்கொடி தூக்கினார். தொடர்ந்து, அவரது அணியினர், சசிகலாவின் நியமனம் செல்லாது என கூறி வந்தனர். அது தொடர்பான மனு ஒன்றும் தேர்தல் ஆணையத்தில், பன்னீர்செல்வம் தரப்பினரால் வழங்கப்பட்டுள்ளது.

அதனைத்தொடர்ந்து, ஆர்கே நகர் இடைதேர்தல் அறிவிக்கப்பட்ட போது, அதிமுக கட்சியையும், சின்னத்தையும் தங்கள் அணிக்கே ஒதுக்க வேண்டும் எனவும் பன்னீர்செல்வம் அணியினர் தேர்தல் ஆணையத்தில் மனுத்தாக்கல் செய்தனர். அதன் பேரில் விசாரணை நடத்திய தேர்தல் ஆணையம், ஆர்கே நகர் இடைத்தேர்தலில் அதிமுக கட்சியின் பெயரையும் சின்னத்தையும் பயன்படுத்தக் கூடாது என இரு அணியினருக்கும் தடை விதித்து உத்தரவிட்டது.

அதிமுக பொதுச் செயலாளர் நியமனம் மற்றும் இரட்டை இலை சின்னம் குறித்த விசாரணையை தேர்தல் ஆணையம் நடத்தி வரும் நிலையில், இது தொடர்பாக கூடுதல் ஆவணங்களை சமர்பிக்க வேண்டும் என, சசிகலா மற்றும் பன்னீர்செல்வம் ஆகிய இரு தரப்புக்கும் உத்தரவிடப்பட்டது.

அதன்படி, கூடுதல் ஆவணங்களை சமர்பிப்பதற்கான காலக்கெடு ஏப்ரல் 17-ம் தேதியுடன் (இன்று) முடிவடைகிறது. இதனிடையே, ஆவணங்களை தயார் செய்து சமர்ப்பிக்க மேலும் 8 வாரம் அவகாசம் வேண்டும் என சசிகலா அணியின் சார்பில் தேர்தல் ஆணையத்திடம் கடந்த வியாழக்கிழமை மனு அளிக்கப்பட்டது. அதன்பிறகு மூன்று நாட்கள் விடுமுறை என்பதால், அந்த மனுவின் மீதான விசாரணையை இன்று நடத்தி, தேர்தல் ஆணையம் உத்தரவு பிறப்பிக்கும் என தேர்தல் ஆணைய வட்டாரங்கள் தெரிவித்துள்ளன.

அதேபோல், இது தொடர்பான விசாரணையை விரைவாக நடத்தி முடித்து, முடிவெடுக்க வேண்டும் என தேர்தல் ஆணையத்திடம் பன்னீர்செல்வம் அணியினர் தரப்பிலும் மனு அளிக்கப்பட்டுள்ளது.

Continue Reading
Click to comment

Leave a Reply

Your email address will not be published. Required fields are marked *

Advertisement

அதிகம் படித்தவை

To Top