ttv-dinakaran

மூன்று நாட்கள் விசாரணைக்கு பின்னர் டிடிவி தினகரன் இன்று மாலை டெல்லிக்கு அழைத்துச் செல்லப்படுகிறார்.

இரட்டை இலை சின்னத்தை பெற லஞ்சம் கொடுக்க முயன்ற வழக்கில், இடைத்தரகர் சுகேஷ் சந்திரசேகர் கொடுத்த வாக்குமூலத்தின் அடிப்படையில் டிடிவி தினகரன் மற்றும் அவரது நண்பர் மல்லிகார்ஜுனா ஆகியோர் கைது செய்யப்பட்டு 5 நாட்கள் நீதிமன்ற காவலில் எடுக்கப்பட்டனர்.
இதனைத் தொடர்ந்து நேற்று முன் தினம் நண்பகல் விமானம் மூலமாக தினகரன் மற்றும் நாகார்ஜுனா ஆகியோர் சென்னைக்கு அழைத்து வரப்பட்டனர். இதன்பின்னர் பெசண்ட் நகரில் உள்ள மத்திய அரசு விடுதி ஒன்றில், இருவரிடமும் விசாரணை மேற்கொள்ளப்பட்டது.

இந்நிலையில் நேற்று சென்னையின் பல்வேறு பகுதிகளைச் சேர்ந்த, இந்த வழக்கில் தொடர்பிருப்பதாக கூறப்படும் 5 பேருக்கும் நேரில் ஆஜராகுமாறு டெல்லி காவல்துறையினர் சம்மன் அளித்தனர். இதற்கிடையே தினகரனுக்கு ஹவாலா பணப்பரிமாற்றத்தில் உதவியதாக, இரண்டு ஹவாலா பண ஏஜெண்டுகள் டெல்லியில் கைது செய்யப்பட்டனர்.

இந்நிலையில் மூன்று நாட்கள் விசாரணைக்கு பிறகு இன்று மாலை தினகரன் டெல்லிக்கு அழைத்துச் செல்லப்பட உள்ளார். இன்று மாலை 7.40 மணியளவில் சென்னையிலிருந்து டெல்லிக்கு செல்லும் விமானத்தில் தினகரன் அழைத்துச் செல்லப்பட உள்ளார்.

டெல்லிக்கு சென்ற பின்னர், வரும் திங்கட்கிழமை தினகரனின் நீதிமன்ற காவலை மேலும் நீடிக்க டெல்லி காவல்துறையினர் மனு அளிப்பார்கள் என எதிர்பார்க்கப்படுகிறது. இதனிடையே அதே நாளில், தினகரனின் ஜாமின் மனுவும் விசாரணைக்கு வருகிறது.