China-India-Arunachal Pradesh

இந்தியா- சீனா இடையிலான எல்லைப் பிரச்னையில் அடுத்தக்கட்டமாக, அருணாச்சலப் பிரதேசம் உள்ளிட்ட இந்திய பகுதிகளுக்கு, தெற்கு திபெத் என அந்நாடு பெயர் சூட்டியுள்ளது.

திபெத் நாட்டை ஆக்கிரமிப்பு செய்த சீனா, அதனை தங்களது ஒருபகுதி என அறிவித்தது. இதையடுத்து, திபெத்தின் தலைவர் எனக் கருதப்படும் தலாய் லாமா உள்ளிட்ட பலர் இந்தியாவில் அரசியல் அடைக்கலம் புகுந்தனர். இதற்குப் பழிவாங்கும் வகையில், இந்தியா மீது 1962ம் ஆண்டு சீனா போர் தொடுத்தது.

இந்த கதை நடந்து, 50 ஆண்டுகளுக்கும் மேலான நிலையில், சீனா தொடர்ந்து தனது அடாவடித்தனத்தை இடைவிடாமல் மேற்கொண்டுவருகிறது.

திபெத்தையும் கடந்து, இந்தியாவின் வடகிழக்கு மாநிலமான அருணாச்சலப் பிரதேசம் மற்றும் சில பகுதிகளை தனக்குச் சொந்தம் கொண்டாடுவதை, சமீபகாலமாக சீனா வழக்கமாகக் கொண்டுள்ளது. இந்த பகுதிகளில் சீன பாதுகாப்புப் படையினர் அவ்வப்போது எல்லை தாண்டி ஊடுருவதும் தொடர்கதையாக இருக்கிறது.

இந்நிலையில், சில நாட்கள் முன்பாக, அருணாச்சலப் பிரதேசத்தில் தலாய் லாமா பங்கேற்ற மத நிகழ்ச்சிக்கு, இந்தியா அனுமதி அளித்தது. இதற்குக் கடும் எதிர்ப்பு தெரிவித்த சீனா, இருதரப்பு உறவு கடும் பாதிப்பை சந்திக்க நேரிடும் என்றும் எச்சரித்தது.

இதற்கேற்ப, தற்போது அருணாச்சலப் பிரதேசம் உள்ளிட்ட 6 இந்திய பகுதிகளுக்கு, புதிய பெயர்களை சூட்டியுள்ளதாகவும், அவை தனக்குச் சொந்தமானவை எனவும் கூறி, சீன குடியேற்றத் துறை அமைச்சகம் புதிய அறிவிப்பை வெளியிட்டுள்ளது.

அதன்படி, சீன மற்றும் ரோமானிய எழுத்துகளை கலந்து, Wo’gyainling, Mila Ri, Qoidengarbo Ri, Mainquka, Bumo La and Namkapub Ri ஆகிய பெயர்களை அந்நாடு சூட்டியுள்ளது. இவை அனைத்தும் சேர்ந்து, தெற்கு திபெத் என அழைக்கப்படும் என்றும் சீனா குறிப்பிட்டுள்ளது.

சீனாவின் இந்த செயலால் மத்திய அரசு கடும் அதிர்ச்சி அடைந்துள்ளது. இதுதொடர்பாக, அந்நாடு விரைவில் வரைபடம் ஒன்றையும் வெளியிடலாம் எனக் கூறப்படுகிறது. இதையடுத்து, சீனாவை ராஜாங்க ரீதியாக எதிர்கொள்வது பற்றி மத்திய உள்துறை அமைச்சக அதிகாரிகளும், வெளியுறவு அதிகாரிகளும் விரிவான ஆலோசனையில் ஈடுபட்டுள்ளனர்.