மீண்டும் ஒத்தைக்கு ஒத்த மோத ரெடியான விஜய், சூர்யா.. யாருக்கு வெற்றி?

2020 ஆம் ஆண்டு இதுவரை வெளியான படங்களில் எதுவுமே பெரிய அளவு கலெக்ஷன்கள் பெறவில்லை என தியேட்டர் அதிகாரிகள் வெளிப்படையாக அறிக்கைகள் வெளியிட்ட வண்ணம் உள்ளன. இந்நிலையில் அடுத்து தமிழ் சினிமா உலகம் அதிகம் எதிர்பார்ப்பது விஜய்யின் மாஸ்டர் மற்றும் சூர்யாவின் சூரரைப்போற்று படம்தான்.

இரண்டு படமும் ஒரே நாளில் வெளியாக அதிக அளவு வாய்ப்புள்ளதாக தெரிகிறது. விஸ்வாசம் மற்றும் பேட்ட படங்களை போல சூரரைப்போற்று மற்றும் மாஸ்டர் ஆகிய இரண்டு படங்களும் வெற்றி பெற வேண்டுமென தியேட்டர் அதிகாரிகள் வேண்டாத சாமி இல்ல.

சரி, இதற்கு முன் சூர்யா விஜய் மோதிக்கொண்ட திரைப்படங்களில் எவை வெற்றி பெற்றிருக்கின்றன என்பதை பார்ப்போம். 2003 ஆம் ஆண்டு சூர்யாவின் பிதாமகன் மற்றும் விஜய்யின் திருமலை ஆகிய இரண்டு படங்களும் நேருக்கு நேர் மோதிக்கொண்டன. இதில் அதிர்ஷ்டவசமாக இரண்டு படங்களுமே பெரிய வெற்றியைப் பெற்றது குறிப்பிடத்தக்கது.

மீண்டும் 2007ஆம் ஆண்டு இதே போல் சூர்யாவின் வேல் மற்றும் விஜய்யின் அழகிய தமிழ் மகன் ஆகிய படங்கள் வெளியாகின. இதில் சூர்யாவின் வேல் படம் பெரிய வெற்றியைப் பெற்றது. தளபதி விஜய் தற்போது வில்லனாக நடித்தால் ஏற்றுக்கொள்ளும் ரசிகர்களுக்கு அப்போது அவரை அப்படி ஏற்றுக் கொள்ள மனம் இல்லை. அதனாலேயே அந்தப் படம் தோல்வியைத் தழுவியது.

2011ஆம் ஆண்டு மிகப் பெரிய எதிர்பார்ப்பில் வெளியான இரண்டு படங்கள் ஏழாம் அறிவு மற்றும் வேலாயுதம். ஏ ஆர் முருகதாஸ் இயக்கத்தில் வெளியான ஏழாம் அறிவு படத்திற்கு வேலாயுதம் படத்தை விட அதிக எதிர்பார்ப்பு இருந்தது உண்மைதான். ஆனால் படம் வெளியான பின்னர் சிறிது நாட்களிலேயே வேலாயுதம் படத்திற்கு வரவேற்பு கிடைத்து இரண்டு படங்களும் முதலுக்கு மோசமில்லை என்பதைப்போல் வெற்றியை பெற்றது.

2016 ஆம் ஆண்டு தெறி மற்றும் 24 ஆகிய படங்கள் ஒரே தேதியில் வெளியாக இருந்தன. ஆனால் சூர்யாவின் 24 படம் அந்த போட்டியில் இருந்து விலகிக் கொண்டது. தெறி படம் மிகப்பெரிய வெற்றியை பெற்றது குறிப்பிடத்தக்கது. தற்போது மீண்டும் 2020 ஆம் ஆண்டு ஏப்ரல் மாதம் விஜய்யின் மாஸ்டர் மற்றும் சூர்யாவின் சூரரைப்போற்று ஆகிய படங்கள் ஒரே தேதியில் வெளியாக உள்ளன.

இரண்டு படங்களுமே திறமையான இயக்குனர்கள் இயக்கத்தில் வருவதால் கண்டிப்பாக இரண்டுமே பெரிய வெற்றியைப் பெறும் என்பதில் எந்த சந்தேகமும் இல்லை. இருந்தாலும் வசூல் ரீதியாக எந்த படம் முன்னிலையில் வரும் என்பது ரசிகர்களுக்கு முக்கியம்.

காத்திருப்போம்!