bus_cinemapettai

பொள்ளாச்சியில் அதிவேகமாக பஸ்களை ஓட்டிய 25 தனியார் பஸ்களை ஆர்டிஓ அலுவலகம் நேற்று பறிமுதல் செய்தது.

திருப்பூரில் இருந்து கோவை செல்லும் தனியார் பஸ்கள், கோவையில் இருந்து பொள்ளாச்சி செல்லும் தனியார் பஸ்கள், மேட்டுப்பாளையம் சாலையில் செல்லும் பஸ்கள் நிறைய பயணிகளை ஏற்றிக் கொண்டு அதிவேகமாக செல்வது தற்போது வைரலாகி பரபரப்பை ஏற்படுத்தியுள்ளது.
ஒருவரை முந்திக் கொண்டு அதிவேகமாக சென்று பயணிகளை ஏற்றுவதுதான் இவர்களது இலக்கே. பஸ் நிலையங்களில் பஸ்களை நிறுத்தி, பயணிகள் ஏறுவதற்குள் பஸ்ஸை இயக்கி வேகமாக மற்ற வாகனங்களை மிரட்டும் வகையில் செல்வதுதான் இவர்களது பாணியே. இது நேற்று, இன்று மட்டும் நடப்பதில்லை. காலம் காலமாக நடந்து வருகிறது. இதை யாரும் தட்டிக் கேட்பதும் இல்லை. பஸ்ஸில் அமர்ந்து இருக்கும் பயணிகள் தங்களது உயிரை கையில் பிடித்துக் கொண்டுதான் பயணிக்க வேண்டும். தற்போது, இப்படி போட்டி போட்டுக் கொண்டு பஸ்கள் செல்வது வீடியோவாக வெளியாகி பெரிய அளவில் சர்ச்சையை ஏற்படுத்தியுள்ளது.

இதைத்தொடர்ந்து பொள்ளாச்சி பகுதியில் வேகமாக சென்ற 25 தனியார் பஸ்களை ஆர்டிஓ அலுவலகம் பறிமுதல் செய்துள்ளது. பொள்ளாச்சி சாலையில் போட்டி போட்டுக் கொண்டு பஸ்களை ஓட்டிச் சென்ற இரண்டு ஓட்டுனர்கள் கைது செய்யப்பட்டுள்ளனர். பொள்ளாச்சியில் இருந்து செல்லும் வாகனங்கள் வேகமாக செல்கின்றன என்று எழுந்த குற்றச்சாட்டை அடுத்து வாகங்களை சோதனையிட பொள்ளாச்சி உதவி கலெக்டர் காயத்ரி கிருஷ்ணன் ஆர்டிஓவுக்கு உத்தரவிட்டார். இதையடுத்து சோதனையிட ஆர்டிஓ கார்த்திகேயன் உத்தரவிட்டார்.

இதையடுத்து, கிணத்துக்கடவில் அதிவேகமாக சென்ற 17 பஸ்கள், பொள்ளாச்சியில் 2 பஸ்கள், கோமங்கலத்தில் ஒரு பஸ் நேற்று பறிமுதல் செய்யப்பட்டன. வாகனங்கள் வேகமாக செல்வது குறித்து பேசுவதற்கு நாளை (மே 2ஆம் தேதி) அனைத்து பஸ் உரிமையாளர்கள் கூட்டத்தை பொள்ளாச்சி துணை கலெக்டர் காயத்ரி கிருஷணன் கூட்டியுள்ளார்.

இவ்வளவு நடவடிக்கை எடுக்கப்பட்ட பின்னரும் தொடர்ந்து வாகனங்கள் வேகமாக சென்று வருகின்றன.